Á dögunum var Uppskeruhátíð tónlistarskólanna haldin hátíðleg. Fyrst var forval í skólunum þar sem valið var atriði til að keppa fyrir hönd síns skóla, svo var svæðisbundin keppni og lokakeppni var síðan haldin í Hörpunni í Reykjavík um síðustu helgi.

Svæðiskeppnin fór fram í Ketilhúsinu á Akureyri. Reyndar átti keppnin upphaflega að fara fram í menningarhúsinu Hofi en því miður var keppnin færð í Ketilhúsið. Það voru mikil vonbrigði hjá keppendum að geta ekki flutt sína tónlist í þessu glæsilega húsi. Ástæðan fyrir því að keppnin gat ekki farið fram í Hofi er fyrst og fremst vegna 

þess að Akureyrarbær gat ekki séð sóma sinn í því að tryggja keppninni húsið. Þess má geta að tónlistarhúsið Harpa bauð lokakeppnina velkomna til sín - án endurgjalds. Mættu Akureyringar taka það til fyrirmyndar, því Hof var, eins og Harpa, byggð fyrir almannafé til að sinna hlutverki menningarhúss. En nóg um það.

Fyrir hönd tónlistarskóla Fáskrúðsfjarðar og Stöðvarfjarðar kepptu fjórir drengir. Það voru þeir Guðmundur Arnþór Hreinsson, Sólmundur Aron Björgólfsson, Viktor Breki Þorvaldsson og Friðrik Júlíus Jósefsson. Þeir skipuðu hópinn The Snooze Brothers. Þeir fluttu gítartvennu í útsetningu Garðars Harðar kennara þeirra.

Það er skemmst frá því að segja að drengirnir stóðu sig með prýði og var mjög erfitt fyrir dómnefndina að velja á milli atriða. Það fór þó svo að Seyðfirðingar urðu hlutskarpastir í samleiksflokki. Þeir voru vel að sigrinum komnir, en í raun hefði hvaða atriði sem er getað verið valið. Slík voru gæðin.

Lokakeppnin fór svo fram sunnudaginn 18. mars í Hörpu.

Nú eru að baki frábærir jólatónleikar hjá Tónlistarskólanum. Nemendur hafa unnið hörðum höndum að því að undirbúa sig sem best fyrir tónleikana og skilaði það sér í frábærri dagskrá og góðum tónleikum. Áhorfendur voru hæstánægðir með frammistöðu nemenda og ekki eru kennararnir síður ánægðir með sitt fólk.